Паспяховы бізнесовец з беларускімі каранямі Віктар Пракапеня прадаў крыптабіржу Currency.com кіпрскай фірме. «Люстэрка» высветліла, хто стаіць за гэтай кампаніяй.
У паведамленні пра ўгоду фігуруе прадстаўнік кампаніі-пакупніка Cxnest Ltd Канстанцін Анісімаў. Пры гэтым яго пасада не агучаная. Як высветліла «Люстэрка», гаворка ідзе пра 38-гадовага інвестара з Вялікабрытаніі з эстонскімі каранямі.
Са звестак сэрвісу northdata.com вынікае, што менавіта кампанія Cxnest Ltd цяпер кіруе зарэгістраванай у Польшчы фірмай Currency Com EU — то-бок прададзенай крыптабіржай Currency.com.
Паводле звестак сэрвісу rejestr.io, Канстанцін Анісімаў з верасня мінулага года з’яўляецца старшынёй праўлення і ўладальнікам Currency Com EU (тое, што бізнесовец мае дачыненне да гэтай крыптабіржы, пацвярджаецца і звесткамі іншых рэсурсаў — першы і другі прыклады).
Паводле звестак сацсетак Канстанціна Анісімава, ён звязаны з кампаніяй CEX.IO Ltd, якая кіруе аднайменнай крыптаплатформай. Бізнесовец таксама выступае ў якасці інвестара ў некаторых іншых тэхналагічных праектах.
Нагадаем, раней стала вядома, што кампанія VP Capital, якая належыць беларускаму бізнесоўцу Віктару Пракапені, пасля працяглых перамоваў канчаткова прадала крыптавалютную біржу Currency.com.
Чытайце таксама
